Ipinagpaliban ng mga pribadong ospital ang ikinasang ‘Philhealth holiday’ sa darating na Enero ng susunod na taon.
Ito ang kinumpirma ni Private Hospitals Association of the Philippines, Inc (PHAPi) President Dr. Jose Rene De Grano matapos ang isinagawang pulong kagabi.
Ayon kay De Grano pinakinggan nila ang kahilingan ng mga pasyente na huwag munang isagawa ang limang araw na ‘Philhealth holiday’.
Paliwanag ng PHAPi President binigyan nila ng konsiderasyon ang apela ng mga pasyente na siya umanong maaapektuhan kapag itinuloy nila ang ‘Philhealth holiday’.
Gayunpaman, binigyan ng mga pribadong ospital ang Philhealth ng isang buwang palugit para ayusin ang mga unpaid claims na siyang ugat kung bakit nagkasa ang mga ito ng protesta.
