Padayong nanawagan ang health cluster ning syudad sa Davao sa mga residente nga pahimuslan ang ulahing adlaw sa national vaccination drive nga matapos karong adlawa.
Matud kang Vaccination Cluster Head Dr. Josephine Villafuerte, taas ang pagdawat sa mga Dabawenyos sa Bayanihan Bakunahan busa laumang karong adlawa moabot pa gihapon sa 49,000 indibidwal ang target mabakunahan.
Awhag sa opisyal nga abli alang sa walk-ins ang anaa sa kapin 20 ka vaccination sites sa syudad ug gilauman nga karong adlawa dagsaon gihapon ang mga vax hubs sa mga gustong magpa first dose, second dose lakip kadtong naka-limot sa ilang dose.
Gawas sa mga vaccination sites padayon usab ang Sangguniang Panlungsod ubos sa Office of the City Vice Mayor sa pagpahoigayon og pagpamakuna alayo gihapon sa national vaccination sa Malabog Elementary School sa Barangay Tapak, ug mobile vaccination alang sa mga lumad sa Barangay Datu Salumay, Marilog District.
Matud usab kang City Covid 19 Task Force Dr. Michelle Schlosser, padayon pang giconsolidate sa vaccination cluster ang ihap sa mga nagpabakuna gikan sa 27 ka city-run vaccination sites, mga private ug sectoral-led vaccination site, ug mobile vaccination.
Nasayrang subay sa datus gikan sa DOH-XI, moabot na sa 2,221,909 indibidwal sa rehiyon ang naturukan sa unang dose sa bakuna, samtang anaa sa 1,721,950 ang naka-kumpleto na sa bakuna.
Samtang subling ibalik ang national vaccination sa umaabot Disyembre 15 hangtud 17, 2021.
