BNFM BICOL— Tuminaas nin triple an numero kan mga ikinasal ngunyan na taong 2021 kung ikukumpara kaning nakaaging 2020 segun sa datus kan PSA-Catanduanes Provincial Statistical Office.
Basado sa ahensya, uminabot sa 519 an saindang naikurit na marriages o mga ikinasal kaini pa sanang naenot na anom na bulan kan presenteng taon. Mas halangkaw nin 350% kumpara sa 147 na mga ikinasal kan 2020 sa kaparehong peryodo.
Sa ibong kaini, triple man ang ibinawas kan mga nairehistrong kasal kung ikukumpara kan 2019 na halos inabot nin kulang-kulang 1,000. Iniyo suboot huli naman sa nagpapadagos na pandemya kung sain nagpa utob an gobyerno nin manlain-lain na restriksyon asin pagbawal nin mga seremonya sagkod pagtiripon na pwedeng mag kawsa nin urulakitan.
Dugang pa kan PSA, an saindang nakolektang mga datus segun sa mga nairehistro kan Local Civil Registry Offices asin sa simbahan.
Puon Enero hasta Hunyo kaning taon, nasa 327 o 65% na mga mag-ilusyon ang nagpakasal sa simbahan mantang nasa 162 man ang nagpakasal sa sibil.
Edad 18-anyos man ang naikurit na mga pinaka hubin na lalaki asin babae ang ikinasal sa isla mantang edad 61-anyos ang pinaka may edad na ikinasal sa kababaihan asin 71-anyos ang pinakama edad na lalaking ikinasal sa bilog na probinsya.
60% kan mga bride asin groom ang nasa 25 hasta 34-anyos na age group mantang 28 mga grooms asin 17 brides ang nasa edad 45-anyos pataas asin nasa 12 brides man ang edad 19-anyos pababa.###
