Gipaslak sa selda sa Magsaysay Police Station ang usa ka lalaki human kini namaligya og kinawat nga bulak alas 11:45 sa buntag niadtong Sabado.
Sa report, giila ang suspek nga si Arnold Dasam Masamloc, 26-anyos, dunay kapuyo nga residente sa Purok Pag-asa, Brgy Poblacion, Matanao, Davao de del Sur.
Una niini midangop sa Magsaysay PNP ang usa ka Adelaida Eroja, 62-anyos nag taga Kasuga, Magsaysay aron ireport ang nangawala niyang mga bulak mikantidad og P15,000.00.
Apan sa samang adlaw usab, usa ka Marjun Laurino, higala sa anak sa reklamante ang nihatag og impormasyon kabahin sa gipamaligyang bulak sa ilang group chat nga susama sa nawala nga mga bulak ni Eroja.
Dali nga naglusad og hot pursuit sa Purok 3, Brgy San Roque, bay-bay sa Malalag ang Magsaysay PNP ug Malalag PNP ug didto nadakpan ang suspek. BNFM-DAVAO
