NAKAANDAM ang bus augmentation sa local public transportation sa Davao City sa higayon nga makatala og daghang public utility drivers nga magpositibo sa COVID-19 nga dili makabyahe.
Kini taliwala sa gisugdang Swab-drive thru sa maong sektor nga gipahigayon sa Crocodile Park ning syudad.
Apan giklaro ni Davao City Mayor Sara Duterte-Carpio, nga samtang naghulat sa resulta sa ilang test ang ubang drayber makahimo pa gihapon sila sa pagpamasada.
Gilauman na nga dunay pipila sa maong hut-ong ang magpositibo sanglit taas ang exposure sa mga drayber nga makahalubilo sa ubang tawo.
Gitataw usab niini nga boluntaryo lamang ug dili mandatory ang swabbing ug tugutan pa gihapon makapamasada ang wala mipailawum sa testing.
Sa laing bahin, isunod sa lokal nga panggamhanan sa libreng swab testing ang mga drayber sa food delivery service sa Swab Drive Thru nga muluntad og 12 ka adlaw o sa Mayo 8, 2021.BNFM-DAVAO
