Dead on arrival sa ospital ang isa ka 24-anyos nga lalaki matapos ginluthang sa guwa sang bulangan sa Barangay Conciencia, Panitan, Capiz takna alas 3:55 kahapon sang Domingo, Enero 7.
Ginkilala ang biktima kay alyas Lloyd, residente sang Brgy. Agkilo.
Samtang ang mga ginatudlo suspek amo sanday alyas Ryan, 26-anyos; alyas Ralden, 48-anyos kag alyas Boyet, 58-anyos lunsay mga residente sang Brgy. Quois sa nasambit nga banwa.
Sandig sa imposmasyon nagikan sa Panitan Municipal Police Station, may daan na nga hiligut-anon ang biktima kag mga suspek.
Nahibaluan nga antes natabo ang pagpangluthang, nagkit-anay ang mga ini sa bulangan kun sa diin ginsinggitan sang biktima ang mga suspek sang “rematch” kag diri na ginlagas sang mga suspetsado ang biktima.
Ginapahayag nga naabtan sang mga suspetsado ang biktima sa guwa sang bulangan kag didto na natabo ang pagpangluthang.
Nag-angkon sang kapilasan sa ulo ang biktima matapos ini ginluthang sang makapila ka beses.
Gilayon naman nga nagpalagyo ang mga suspetsado sa indi mahibaluan nga direksyon matapos ang nakumiter nga krimen.
Narekober sa crime scene ang 4 ka bala nga wala naglupok kag mga basiyo sang ginaalegar .45 calibre sang armas-luthang.
Sa karon, padayon ang hot pursuit operation sang mga kapulisan agud madakpan ang mga suspek. | Judy Ann Juare
