Naka-full alert status sukad kagahapon ang Davao City Police Office (DCPO) nunot sa nahitabong pagpamomba sa Dimaporo Gym sa Mindanao State University, Marawi, Lanao Del Sur.
Mas gipakusgan pa ang mga checkpoints sa mga border control sa Davao City pinaagi sa Davao Defense System.
Ang Oplan Davao Defense System (DDS) sa DCPO maoy magpatuman sa hugot nga security measures sa syudad ug sa mga kasikbit o mga borders aron mapugngan ang mga posibleng pagpangatake sa mga terorista sa Davao City.
Ilalom sa maong Oplan, mas pakusgan ang police visibility sa tanang simbahan dinhi sa Davao City.
Samtang, magpahigayon sab ang City Explosive ug K9 Unit sa DCPO ug paneling operations ayha magpahigayon og bisan unsang aktibidad alang sa seguridad sa publiko.
Nakig-alayon na sab ang DCPO sa CTTMO ug TF Davao aron masiguro nga mapadayon ang temporary restrictions sa mga lihok sa mga pasahero sa mga bus nga nagbiyahe sulod sa Davao City.
Una nang gipasalig sa DCPO generally peaceful ang syudad ug walay naminitor nga direktang hulga.
