LEGAZPI CITY – Padagos ngunyan an preparasyon kan Municipal Disaster Risk Reduction and Management (MDRRMO) Pio Duran para sa papaabot na kapyestahan kan duwa nindang patron, an Nuestra Señora de Salvacion asin San Rafael Archangel sa maabot na Disyembre 1 asin 2.
Sa intrevista kan Brigada News FM Legazpi kay MDRRMO Pio Duran head Noel Ordoña, sinabi niya na dakol an mga aktibidad na piglinyada asin piglalaoman an pagbisita nin kadakol na mga tawo.
Huli kaini, pinalimpyahan na ninda an mga kanal sa mga lugar orog na duman sa mga kadalasan na pigbabahang mga barangay nganing magin komportable an mga tawo.
Dai man ninda pighahale an posibilidad ki mga pag-uran sa aldaw mismo kan kapyestahan kaya nagpapadagos man an saindang monitoring.
Pigsyerto ni Ordoña, preparado an saindang contingency plan asin en kaso magparauran, may mga residente sindang paramientras na ipapatenir sa covered court.
Mientrastanto, sa ngunyan, segun saiya, wara sindang nanutarang insidente nin landslide.
