LEGAZPI CITY – Pigsyerto kan Bureau of Fire Protection (BFP) Albay na ligtas an mga botante asin mga paratukdo na masirbi sa eleksyon huli ta ligtas man an mga eskwelahang gagamiton bilang polling precincts.
Segun kay F/INSP. Jeffrey Baldo, an chief operation kan BFP Albay, nalibot na ninda asin nainspeksyon an mga eskwelahan nganing maasegurar an safety kan mga tawo sa eleksyon.
Hihilingon ninda an linya kan kuryente kan lambang eskwelahan sa probinsya nganing malikayan an pagkakaigwa nin kasulo sa aldaw mismo kan eleksyon asin birilangan.
Apwera kaini, igwa man ki fire truck na malibot sa mga barangay kasabay an mga personahes kan PNP nganing syertohon na mayong mangyayaring kasulo sa mga harong en kaso bayaan kan mga residente para magboto.
Segun pa kay Baldo, nagdesignar na sinda nin lugar sa kada munisipyo asin syudad sa probinsya na pagbubugtakan kan fire trucks nganing magin marekas an pagresponder sa mga emerhensya.
