LEGAZPI CITY – Preparado na an probinsya kan Albay para sa pag-host kan ikokondusir na ‘on-shore at-sea training and exercises na parte kan Exercise SAMA-SAMA 2023, sarong bilateral navy-to-navy engagement sa pagultanan kan mga militar kan Estados Unidos asin Pilipinas.
Ikokondusir ini sa isla kan Rapu-Rapu poon saaga, Oktubre 8 hasta Oktubre 13, kun sain papangenotan ini kan Naval Forces of Southern Luzon (NAVFORSOL).
Segun kay NAVFORSOL Assistant Public Affairs Officer, Lt. Kim Paulo Lopez, sa sarong semanang exercise piglalaoman na isasagibo sa probinsiya an pirang mga naval exercises, sports activities, asin public affairs engagements.
Pigkakalkulong maabot sa syete-syentos na sailors hale sa manlaen-laen na units kan Philippine Navy an mapartisipar, kaibahan man sa mga gagamiton na Philippine assets – BRP Antonio Luna, AW109 naval helicopter, C-90 aircraft, asin an Naval Special Operations Unit.
