LEGAZPI CITY – Pigrekomendar na kan Commission on Election (COMELEC) Bicol sa COMELEC en banc na isairarom sa COMELEC control an banwaan nin Libon Albay durante sa haros sunod-sunod na insidente nin panggangadan sa mga opisyales kan barangay.
Ini an pigkumpirmar ni COMELEC Bicol Regional Director Atty. Ma. Juana Valeza sa Brigada News FM Legazpi.
Segun kay Valeza, an banwaan igwa nin kasaysayan ki mga bayolenteng insidente, makusog na iriwal o kompetisyon na may kinaraman sa pulitika, presensya kan Communist Terrorist Group (CTG) asin mga criminal gang.
Huli kaini, magigin maigot an komisyon sa pagpapautob kan mga regulasyon, total gun ban, magin an dugang na esfuerso kan kapulisan, kasuldadusan asin kan manlain-laing law enforcement agency nganing masiyerto an seguridad kan komunidad asin mamantenir an pace orden.
Mantang nagpaparani na an election sa barangay, may mga dugang na esfuerso na ibinugtak an PNP asin Philippine Army, kun sain nagbilog naman nin task force sa banwaan nganing masyerto na warang makukulugan na mga residente sa lugar.
