PADAYONG nasinatian sa mga drayber ang lubak ug lapokon nga dalan duol sa gina-construct nga underpass sa Bulaong-Makar Road, National Highway sa GenSan nga maoy nakahatag matud pa og kahasol sa mga naga-agi.
Saysay ni alyas Jun residente sa Barangay Lagao nga wala nagpaila sa tinood niining pangalan, apektado siya sa lubak nga agianan sa nahisgotang lugar ilabi na matag adlaw kini nagahatod og pasahero.
Buot niini nga ayohon sa mga contractor sa underpass ang temporaryong dalan nga naa sa kilid aron dili maglisod ang mga sakyanan nga moagi ilabi na ang mga estudyante ug trabahante nga nagabiyahe matag adlaw.
Nasabtan ni Jun nga dugay pa mahuman ang construction sa underpass ug naluoy matud pa kini nga motan-aw sa mga tawo nga moagi kay pirteng lisoda ang dalan. I Enamie Mogpon
