LEGAZPI CITY – Apat na persona an nadakop kan mga otoridad sa pigkondusir na operasyon kontra iligal na pagsugal sa banwaan kan Libon, probinsya kan Albay, alas tres nin hapon kasuodma.
Binisto an mga akusado na sina alyas “Ronaldo”, 40 anyos; “Robert”, 33 anyos; “Alan”, 49 anyos; asin “Marcos” 45 anyos na mga residente kan nasambitan na banwaan. Basado sa report kan pulisya, sa pigkondusir na operasyon kan Libon MPS, naarestar an naunambitan na mga akusado na nagpapartisipar in flagarante delicto sa iligal na tupada.
Nakumpiskar hali sa mga akusado an bet money na nagkakantidad P1,800 sa manlain-lain na denominasyon, sarong buhay manok na pambulang asin sarong tari.
Dinara an mga akusado sa Libon RHU para sa pisikal na eksaminasyon asin presenteng nasa irarom nin kustodiya kan Libon MPS kaibahan an mga nakumpiskar na ebidensya para sa magkakanigong disposisyon.
