GIKONDENA ni Police Regional Office (PRO)12 Regional Director PBGen Jimili Macaraeg ang nahitabong pagbusikad sa suspected IED sa usa ka unit sa Yellow Bus Line (YBL) Incorporated sa Brgy.New Isabela, Tacurong City, Sultan Kudarat, alas 11:30 sa buntag, Dominggo, Nobyembre 6.
Dugang ni Macaraeg nga makasusubo ang nahitabo ug nagmando sa pagmugna og Special Investigation Task Group (SITG) nga pangunahan sa DRDO.
Ang SITG gimugna aron maimbestigahan ang pagpabusikad sa bus sa YBL nga gikamatay sa 1 ug gikaangol sa laing 11 pa ka indibidwal ug aron nga masulbad ang kaso ug paspas nga pag-aresto sa suspek.
Matud sa opisyal aduna na kini mga person of interests apan dili pa nila mabutyag ang identity sa pagkakaron.
Gipaniguro usab ni Gen.Macaraeg sa publiko nga kini ang usa ka isolated incident lamang ug ang security sector apil ang TF Talakudong ang ‘on top of the situation’ ug walay rason nga mag panic ang katawhan.
Ginaawhag usab niini ang publiko nga ipadangat ngadto sa kapulisan ang unsa mang impormasyon nga mohatag og lead sa kasulbaran sa insidente.
