MAKAPAINIT na gawas sa ilang balay si Lola Basilisa Canupin, 88-anyos tungod may wheelchair nga kining magamit.
Asoy sa anak niini nga si Lucia Baya nga lisod ang ilang sitwasyon tungod gamay lang usab ang kita sa pagpanagat sa bana niini nga maoy gaatiman ug gabuhi sa tigulang.
Lima ka tuig nga sa salog nalang gapirme si lola Canupin tungod sa iyahang spinal cord disability gani didto lang kini magpirme sa salog tungod kung mutikang kini, siguradong matumba tungod wala nay kusog ang tuhod.
Kini ang hinungdan nganong nangayo kini og tabang sa KaBrigadahan GenSan nga mahatagan og wheelchair aron nga makagawas gawas usab kini sa ilang balay ug dili lang maglubog sa kwarto.
Personal usab gihatod ni Idol Brigada Elmer V. Catulpos sa ilang panimalay sa Barangay Calumpang ang wheelchair.
Ang gihatag nga wheelchair kay gikan sa pagtinabangay sa mga miyembro sa KaBrigadahan Gensan nga walay puas sa pag donar arun makatabang sa mga nanginahanglan nga miyembro. Gani gitawag ni Idol Brigada Elmer nga bayani ang mga miyembro sa programa tungod sa ilang walay puas nga pagtabang sa ilang isigkatawo.
