Madinaeag-on nga napauli pabalik sa andang lugar ro 74 nga mga badjaos matapos nga nag abot ro mga raya sa Iloilo City halin sa Bacolod City ku nagtaliwan nga adlaw.
Ro pagpapauli sa mga raya hay nag agi pinaagi it koordinasyon sa DSWD ngani napauli ro mga raya sa andang lugar.
Ro mga badjaos hay ginpasakay it Ceres bus paagto it Dumaguete ag paagto it Zamboanga.
Ginpasaeamatan man ni Iloilo City Mayor Jerry Treñas ro bulig it CSWD, PSTMO sa pag-rescue sa mga badjaos hasta makabalik ro mga raya sa Zamboanga.
Matandaan nga nagpaguwa si Mayor Treñas it Executive Order No. 83 nga nagadeklara kay Bacolod City Vice Mayor El Cid Familiaran bilang persona non grata sa syudad.
Suno sa alkalde, nagapangunang obligasyon it gobyerno nga serbisyuhan ag protektahan ro mga tawo, ag ipabilin ro peace and order.
Dapat segun nga i-facilitate ni Familiaran ro pagpauli sa mga badjaos o ‘sea gypsies’, sa andang mga lugar para indi eon magpakalimos ag magkalat ro mga raya sa syudad it Bacolod.
Owa segun naila mag discriminate si Treñas, pero owa gid segun imaw naila sa ginhimo it bise alkalde nga magsugo nga magsaylo sa Iloilo ro mga badjaos nga owa it nagakaigu nga koordinasyon ag komunikasyon.
Samtang, insigida man nga nagpangayo it pasaylo si Bacolod City Mayor Alfredo Abelardo B. Benitez kay Mayor Treñas sa natabo ag ginbatun man raya it alkalde it Iloilo. // ANN DESLENE SALAZAR
