Giklaro sa lokal nga panggamhanan sa Asuncion, Davao del Norte nga dugay na sumala pang gipahingmanoan ang mga residente sa gi-demolish nga luna sa nahisgutang lugar.
Kahinumdoman nga gidemolish ang 7 ka panimalay sa Prk. 5-B Magatos, Asuncion sa nahisgutang probinsya gumikan nga ang maong luna, pinag-iyahan matud pa kini sa LGU-Asuncion ug kinahanglan na kining gamiton isip tukoran sa Trichoderma Lab infrastructure alang sa kalamboan sa mga mag-uuma kung asa ibutang ang production of biofertilizer nga nagkantidad og 2 milyon pesos.
Gikaingon nga wala sumala pay court order ang maong pag demolish niini apan una ng giklaro ni Mayor Eufracio Jr Dayaday, nga dili na matud pa kini kinahanglan og court order sanglit pinag-iyahan kini sa LGU-Asuncion.
Gipasabot sab ni Mayor Dayaday nga ang mga nanimuyo ngadto sa lugar gikonsidera nga Proffesional squatters ug dili kini ipang relocate sanglit aduna sumala pa silay balay sa Sto. Tomas ug Tagum City.
Hinuon, andam ang ang Mayor mu-utubang aron tubagon ang mga pangutana kabahin sa nahitabong demolition sa nahisgutang lugar. BNFM-Davao
