LEGAZPI CITY – May kinaraman sa mga insidente nin panggagadan sa nagkapirang opisyales de gobyerno sa probinsya kan Albay an duwang nagadan na miyembro nin New People’s Army (NPA) sa nangyaring engkwentro kasuudma sa Brgy. Bascaran, banwaan kan Daraga.
Binisto an mga nagadan na suspetsado na sinda Rizaldy Perdigon, alyas “Sandro” asin si Allan Balde Leron, alyas “Jason”, parehong may alangkaw na posisyon sa NPA.
Sa intrevista kan Brigada News FM Legazpi kay Albay Police Provincial Office Spokesperson PCapt. Kharren Formales, sinabi niya na basado sa saindang imbestigasyon magin kan Philippine Army asin Intelligence Unit, an nasambit na mga suspetsado parehong may kinaraman sa panggagadan kay PSSgt. Abel Sevilla kan Legazpi CPAC-4 na tinambangan sa Sitio Agna, Brgy. Homapon kan nasambit na syudad kan nakalihis na Abril.
Apwera kaini, kumpyansa sinda na an mga ini man an mga nasa likod kan panggagadan sa duwang militar na sinda PFC Mark June Esico at PFC John Dave Adcolin na pinagbabaril sa Brgy. Cotmon, Camalig noong Pebrero, kun sain ang mga biktima nakatalaan kuta nang mag-asister sa Cessna Plane search, rescue and retrieval ops.
Sinda man an pinagtutukdong mga suspetsado sa pambabadil-gadan kay retired PCol. Ramiro Bausa na nagdalagan sa pagkakonsehal alagad binadil kan ini nangangampanya sa Brgy. Cagbacong, Legazpi City kan Abril 2019.
Dugang pa digdi, imbwelto pa su boot an mga ini sa kaso nin pagsusulo ki mga ekipahe kan mga otoridad na piggagamit sa tinampo sa syudad.
Mientrastanto, sa sainda pang imbestigasyon, segun kay Formales, apwera sa 2 nagadan na mga suspetsado, igwa pa su boot ining mga kairibahan na nasa poko mas o menos 6 katawo.
Segun pa ki Formales, huli sa engkwentro asin sa pagkaidentificar kan mga suspetsado, dakol na mga kaso an mareresolberan.