SALAMAT ang bugtong nasulti sa duha ka benepisyaryo human nakadawat og wheelchair.
Nakabenepisyo sa wheelchair si Delia Ecot, 68-anyos, taga Purok 2 Cuyos, Barangay Mabuhay, General Santos City.
Butyag ni Sergio, mister ni Delia dako ang pasalamat niya sa mga mitabang aron mahatagan og wheelchair ang misis.
Human kini na-stroke lima katuig ang milabay, naa na lang sa kwarto nila nagtuyok ang kalibutan sa misis.
Makagawas usahay sa balay apan kinahanglang alsahon apan karon nga duna na kini magamit nga wheelchair mahimo na kining makagawas.
“Sa kalisod sa among kinabuhi, wala ko nagdamhom nga naay motabang namo, salamat kaayo sa inyong tabang.”
Dunay lima kaanak ang magtiayon ang nag-anak nila nga nagtrabaho sa construction ang natabang kanila.
Samtang gikalipay ni Marife Dawa ang pagkaangkon og wheelchair sa ugangan niini nga si Janita, 60-anyos, taga Purok 27 Yamville.
Tungod lisod kanila nga makapalit niini gumikan apektado sa Covid-19 pandemic ang trabaho sa iyang bana ug ubang miyembro sa pamilya.
Si Janita ang tulo na katuig nag-antos sa balatian nga chronic disease miresulta kini sa pagkalakaw niini ug sa usa ka semana ikatulo kini kahigayon ipailawom sa dialysis.
“Dako ni og tabang sa kapaet kay kaming mga anak naluoy me nagtan-aw niya pero wala me ikatabang tungod apektado ang among pangabuhian sa pandemya.”
Ang mga nasangpit ang benepisyaryo sa Kabrigadahan GenSan ug ang wheelchair ang gitunol personal ni Idol Brigada Elmer V. Catulpos.
