Pilas sa pungyahun, liug kag nawala nga abaga ang naagum ni Ariel Pedio, 23 anyos, kag residente kang Brgy. Salaguiwan, Patnongon, Antique matapos nga dya ang ginlabo ni Steven Montero, 19 anyos, kag residente naman kang Sitio Igcapayas, Brgy. Aureliana, Patnongon kang Agosto 19, las-11:30 sa gabi-i sa nasambit nga lugar kang suspek.
Suno sa kapulisan, samtang nagainum-inum ang biktima kaimaw kang anang bugto nga si Mark Pedio sa balay kang anang anay live-in partner nga si Stefany Montero kag bugto man ka dya nga si Stephen Montero, nag-abot ang dyang suspek sa diin gin-agda pa kang biktima nga imawan sanda sa paginum-inum apang nanghindi ang suspek kag rugto ron may nagluntad nga wara pag-intindihanay kag pagbinaisay.
Ginbanta las-11:30 kang amo nga petsa, naghalin ang suspek kag sa pagbalik ka dya, hinali lang nga labo ang biktima sa anang pungyahun, liug, kag nawala nga abaga.
Gilayon naman nga gindara kang MDRRMO Patnongon ang biktima sa Bugasong Medicare Community Hospital para sa nagakaigo nga pagbulong samtang nagpalagyo naman ang suspek sa wara ma man-an nga direksyon dara ang gingamit sa krimen.
Padayon naman ang hot pursuit operation kang Patnongon Municipal Police Station para sa posible pagka-aresto kang suspetsado.
