Subling nadugangan ug kapin sa usa ka libo ka mga bag-ong kaso sa Covid-19 ang Central Visayas.
Sa datus nga gipagawas sa Department of Health-7, adunay nadugang nga 1,105 ka mga bag-ong kaso kagahapong adlawa.
Sa nahisgutang ihap, anaa sa 221 ang gikan sa dakbayan sa Sugbo, 73 sa Lapu-lapu, 135 sa Mandaue, 278 sa Bohol, 352 sa Cebu Province, 38 sa Negros Oriental, ug walo sa Siquijor.
Tungod niini, misaka na sa 114,159 ang kinatibuk-ang kaso nga natala diin 16,839 ang mga aktibo.
Samtang ang mga naayo, misaka na sa 93,675 human nadugangan ug 660.
Aduna usab 71 nga nadugang sa namatay diin 50 gikan sa Probinsya sa Sugbo, 17 sa dakbayan sa Sugbo ug tag duha gikan sa Mandaue ug Lapu-lapu.
Sa kasamtangan, ang rehiyon adunay 3,645 ka kinatibuk-ang ihap sa Covid-19 related deaths sa Rehiyon.
