Nagpaalala ang COMELEC sa lahat ng mga kandidato na sumunod sa mga alituntunin hinggil sa tamang paglalabas ng mga gamit sa pangangampanya ngayong Barangay and SK Elections (BSKE).
Sa naging panayam ng Brigada News Team kay Cauayan City Election Officer Atty. Christopher Thiam, hindi na aniya naaangkop ang 3×8 ft na tarpaulin.
Aniya, ang barangay election ay non-partisan o walang kinikilingan at ang 3×8 ft na banner ay pwede lamang na ilagay sa headquarter ng kandidato o sa kanilang mismong bahay.
Batay naman sa COMELEC ang standard size ng mga campaign materials ay nasa 2×3-feet.
Hindi rin maari na maglagay ng mga materyales sa mga pampublikong lugar maging sa mga poste ng kuryente at mga puno.
Ang sinumang mapapatunayang lalabag sa batas ay maaaring makulong ng isa hanggang anim na taon, tuluyang pagkaka-diskwalipika sa anumang posisyon sa gobyerno, posibleng tanggalan ng karapatang makaboto at maaring ma-disqualify sa pagiging kandidato.
