Close

Ulahing adlaw sa kampanya sa Brgy. 23-c nasamok, 3 samaran

Sponsor ads


Miresulta sa kagubot ang ulahing adlaw sa kampayan sa Barangay ug Sangguniang Kabataan Election sa Barangay 23-C, Davao City kagabii human mag engkwentro ang mga supporters sa duha ka kapitan nga midagan.

Sa interbyu gisaysay ni Police Chief Insp. Nolan Raquid hepe sa Sta. Ana Police Station nga alas 7:00 sa gabii sa dihang nadawatan nila ang report sa matud pa panag engkwentro sa mga suspporters sa duha ka kandidato nga silang Kapitan Alimuden Wating Usman ug kaatbang niini nga si Amil Bangsa Manding sa Purok 3, Isla Verde sa nasangpit nga barangay.

Sumala pa ni Raquid nga basi sa ilang pag-imbestiga gisaysay sa usa ka saksi nga unang nagkalalis ang mga supporters sa duha ka kandidato hantud na nagsumbagay ug dunay nagpabuto og pusil gikan sa wala masayring direksiyon.

Miresponde usab ang labaw sa Task Force Davao sa maong barangay nga si Col. Nolasco Mempin diin nahinabi matud pa niini ang duha ka kampo nga mibutyag sa tagsa-tagsa nilang mga bersiyon sa maong hitabo.

Samaran sa nasangpit nga hitabo silang Alcon Ebrahim, 48 kinsa naigo og bala sa bukton nga igo lamang matud pa miagi sa maong lugar sa dihang nagka gubot, Alibaser Cabuntalan nga tigsuporta ni Manding, ug Abdul Amar Asis nga supporter ni Usman.

Sumala ni Raquid nga anaa na sa luwas nga kahimtang ang mga biktima ug nagpadayon ang ilang imbestigasyon sa nasangpit nga kaso aron masayran ang tinuod nga nahitabo.

Kahinumduman nga ang Barangay 23-C ang bugtong barangay sa sentrong bahin sa Davao City ang nalakip sa election watchlist areas gumikan sa magkaribal nga barangay kapitan. BNFM-Davao