Close

Presyo sa bugas sa Kidapawan, mas ubos pa sa SRP

Sponsor ads


ANTIPAS, NORTH COTABATO- MAS ubos pa og presyo ang bugas dinhi sa s’yudad sa Kidapawa, ikumpara sa suggested retail price (SRP) nga gihatag sa Department of Agriculture (DA).

Kana ang mapagarbohong gikonpirma nganhi sa Brigada News FM- Kidapawan ni Mr. Toto Bacus- ang kasamtangang labaw sa Grains Confederation of the Philippines (GraiCon) Kidapawan Chapter.

Nasayran nga ang kasamtangang SRP sa well-milled rice nga gihatag sa DA mokabat gayud sa P44 matag-kilo, pero dinhi sa Kidapawan gikanayon ni Mr. Bacus nga mikabat lamang kini sa tag-P40 hangtud P42 kada kilo.

Samtang ang regular milled rice nga tag-P39 matag-kilo sa SRP, mikabat lamang matud pa kini’g P38 kada kilo dinhi sa Kidapawan.

Apan, gi-angkon ni Bacus nga kung premium rice ang hisgotan mas taas og gamay dinhi sa Kidapawan, ikumpara sa gihatag nga SRP sa DA.

Ang kasamtangan matud pang presyo sa premium rice dinhi sa Kidapawan mokabat sa P48 hangtud sa P50 matag-kilo, sukwahi sa SRP price nga mokabat lamang sa P47.00 kada kilo.

Pero, wala ra niini mabalaka si Bacus, gumikan ang kasamtangang gipahamtangan sa DA og SRP price sa mga bugas didto pa lamang sa Metro Manila, wala pa’y labot dinhi sa Mindanao. (Rem C. Agdon)