Close

Kawani sa DSWD ug kanhi kagawad, sikop sa druga

Sponsor ads


Cagayan de Oro City - Dakpan sa managlahing drug buy bust operation ang usa ka empleyado sa DSWD-10 ug usa ka kanhi Barangay kagawad.

Giila sa kapolisan sa Agora Police Station 3 (PS3) ang suspek nga si Martil Pamisa, usa ka empleyado sa DSWD-10 hingkod ang panuigon ug nagpuyo sa San Juan 1, Barangay Lapasan ning siyudad.

Matud ni C/Insp. Rey Taboclaon, hepe sa maong buhatan nga gipahigayon ang maong operation sa Gaabucayan Ext. Barangay Lapasan ni siyudad ug positibong napalitan sa mga operatiba ang suspek sa usa ka sachet sa gituohang shabu nakuha usab sa posisyon niini ang P500 buy bust money.

Gikunsidera sa mga otoridad nga usa ka high value target ang suspek tungod kay empleyado kini sa gobyerno.

Taud-taud na matud pang gi-monitor sa kapolisan ang dinakpan.

Hugtanong gilimod usab sa suspek nga napalitan siya sa maong druga apan butyag sa kapolisan nga adunay video nga nagpamatuod nga siya napalitan gayud sa gidiling druga.

Samtang dakpan usab sa Lumbia Police Station 8 ang usa ka kanhi Barangay Kagawad sa Tuburan, ning siyudad ug ang kauban niini kinsa target sa maong operation.

Giila ni SPO1 Johnmar Picot ang mga dinakpan nga sila Archie Dableo, 38-anyos, kanhi kagawad sa maong barangay ug Dominic Cotehall, 33-anyos.

Base sa report, target sa maong operasyon si Cotehall kinsa nakuhaan sa usa ka sachet sa gituohang shabu apan kauban matud pa niini si Dableo hinungdan gidakop usab dihang nakuhaan usab sa usa ka pakete sa gidiling druga.

Posibling mag-atubang sa kasong paglapas sa R.A. 9165 kon comprehensive dangerous drugs act of 2002 ang mga dinakpan. (BPC-CDO)