Close

High-powered firearms nakumpiska sa Oplan Galugad

Sponsor ads


PAGADIAN CITY - Ubay-ubay’ng mga tag-as nga kalibre sa armas ang nakumpiska sa mga sakop sa Philippine National Police, CIDG, RMFB, PMFC ug Pagadian City Police Station sa gilusad nga Oplan Galugad sa Provincial Government Complex, Dao, Pagadian City kaniadtong Sabado.

Apil nga naabtan sa maong complex ang 69 ka mga piniriso nga adunay mga kasong murder, rape ug drug pushing.

Matud pa ni Police Sr/Supt Armel Gongona sa CIDG, posibleng makasuhan ang upat ka prison guards ug warden kon mapamatud-ang gikonsente ang mga piniriso sa paghupot ug mga armas, hilabi na nga adunay upat nga sentensiyado na sa kasong giatubang.

Matud usab ni Police Sr/Supt. John Guyguyon, labaw sa Zamboanga del Sur provincial Office, sa ilang pagsulod sa Pagadian Provincial Jail ilang nakit-an nga ang ubang piniriso ang wala sa selda, kon dili anaa sa gawas luyo nga ang mga nahisgutan adunay mga mabug-at nga kaso. Gikuwestiyon niini, nganong didto gibutang sa provincial government complex sa Dao ang mga piniriso nga luyo nga usa kini ka government center.

Gipaklaro usab ni Zamboanga del Sur Governor Antonio Cerilles sa gipatawag nga presscon nga gibutang ang ubang piniriso sa provincial government complex isip extension cell, base usab matud pa sa resolusyon sa Sangguniang Panlalawigan tungod huot na ang provincial jail kon asa mukabat lang matud pa, sa 300 hangtud 400 ang kapasidad niini apan gibana-banaang mukabat na sa 600 ang mga piniriso.