Close

Giabangan nga balay sa nanag-iya sa investment scheme giransak na usab mga nasuko nga investors

Sponsor ads


GENERAL SANTOS CITY-MURAG gi-agian og bagyo ang balay nga giabangan sa nanag-iya sa investment scheme nga NMC Trading sa Doña Soledad subdivision sa Barangay Labangal alas nuebe sa gabii adlawng Lunes.

Sa unang pagtuo sa mga barangay police nga mibalhin lang og balay ang mga gahakot og mga butang apan nasayran na lamang nga giransak diay sa mga nangasuko nga mga investors.

Lakip gipangdala ang mga appliances, mga sanina, uban pang mga gamit ug mga dokumento sa maong balay nga girentahan ni Espiridion Sanchez 5th.

Segun sa caretaker sa balay nga wala siyay mahimo aron pugngan ang mga nangasuko nga investors asa nagplano na lamang kini sa pagpasaka og kaso.

Kahibaluan nga adlawng dominggo usab giransak sa mga nangasuko nga investors ang balay sa mga Sanchez sa Capareda St., Barangay Lagao asa gipangkuha usab ang mga gamit ug ubang mapuslang butang.

Ang maong investment scheme mitanyag og hangtud 400 percent nga tubo sa kwarta nga gi-invest sa mga miyembro sulod sa usaka bulan, ang nadugang sa daghang nanirado o kaha giikyasan sa mga nagpasiugda niini.