Close

11-anyos dalagita nag hikog

Sponsor ads


Gideklarang dead on arrival sa ospital ang usa ka 11-anyos nga dalagita human gitoohang kining nag hikog sulod sa ilang panimalay sa Los Amigos, Tugbok, Davao City kagabii.

Sa report sa Tugbok Police Station igo na lamang nakita sa iyang 6-anyos nga igsoon nga nagbigti na ang iyang ate nga si alyas Jane, usa ka grade 5 nga tinun-an kon asa nagpakitabang kini sa ilang mga silingan.

Gitabang pa sa mga silingan og barangay opisyales ang biktima apan nakabsan gihapon kini sa iyang kinabuhi.

Nasayran nga una nang nahimong suspek si Jane sa pagpangawat sa usa ka tindahan nga iya matud pang giangkon og misaad nga ibalik ang salapi apan mihangyo nga dili na ipahibalo sa iyang ginikanan diin gituman usab kini sa tag-iya sa maong patigayon.

Atol sa imbestigasyon sa otoridad sa nahitabuan nakuha ang usa ka kahon nga dunay mga kwarta nga nagbalor sa P3,020 nga gitoohang bilin sa P5,000 nga nawala sa tindahan.

Saysay usab ka wala nagpailang silingan sa biktima sa interbyu sa BRIGADA nga posibleng tuman kaulaw o dili kaha kahadlok ang nabati ni Jane nga maoy nakitang rason sa iyang paghikog.

Gibutyag usab ni Police Senior Insp. Maria Teresita Gazpan ang spokesperson Davao City Police Office nga makig-alayon sila sa City Social Services and Development Office aron sayron kon duna bay problema sa pamilya sa biktima.

Una na usab gibutyag sa Tugbok PNP nga walay timailhan nga dunay foul play ang hitabo.

Nasayran nga atol sa panghitabo wala ang mga ginikanan sa biktima sanglit nagtrabaho sila sa layo og ang igsoon lamang niini ang kauban sa ilang balay. BNFM-Davao