GIALERTO sa presidente sa Soccsargen Transport Group Federation ang mga drayber ug konduktor sa kapin 200 ka mga unit sa public utility van nga gabyaheng Polomolok, Marbel ug Gensan kon POL-MAR-GEN nga inspeksyunon ang mga bagahe sa mga pasahero nga isakay sa ilang mga unit aron malikayan ang unsa mang kakulian.
Kini may kalabutan sa nahitabong pagpabusikad sa usa ka unit sa Yellow Bus Line sa Koronadal City ug Tacurong City. Gibutyag ni Sayd Omar Akmad nga sa dihang nasayran ang balita kalabutan sa maong insidente, gilayon niining nagpahigayon og inspeksyon sa terminal aron hatagan og pahibalo ang mga draybers o operator sa mga van.
Nangayo usab kini og pagsabot sa mga pasahero ugaling madelatar sa ilang byahe ug nihangyo sa ilang kooperasyon aron malikayan ang susamang insidente. I MJ Fernandez
