GIAWHAG karon sa Department of Health kun DOH-12 ang katawhan nga padayun lang sa pagtuman sa minimum public health standards luyo sa bahad sa bag-ong variant sa COVID-19 nga mao ang Omicron.
Segun ni Arjhon Gangoso, tigpamaba sa DOH-12 nga kasamtangan, padayun pa ang pagtuon sa mga eksperto kalabot sa bag-ong variant ug bisan ang national government ang gahulat usab sa update.
Apan bisan pa niini, mas maayo gihapon nga musunod sa public health standards sama sa hustong pagsuot sa face mask, physical distancing ug paghugas sa kamot ug magpabakuna.
Gidugang ni Gangoso nga human ang tulo ka adlaw nga malampusong national vaccination day, nagpadayun ang schedule sa mga LGU alang sa mga wala pa nabakunahan ug sa mga magpa-second dose.
Sa bahin sa ikaduhang hugna sa national vaccination day, gibutyag ni Gangoso nga naghulat pa sila sa update sa national government luyo nga may una na usab nga plano ang mga health authorities sa nasud.
