Gitawag gihapon nga malampuson sa kagamhanang lokal sa Cagayan de Oro ang unang adlaw sa pakiglambigit sa tulo ka adlaw nga Bayanihan Bakunahan COVID-19 National Vaccination Roll-out.
Kini ang gibutyag ni CDO Bayanihan Bakunahan 2021 Focal Person Antonio Resma Jr.,taliwala sa pipila ka mga kakulian nga nasinati kagahapong adlawa sa nagkadaiya nga vaccination sites sa syudad.
Matud ni Resma nga malampuson ang kalihukan tungod bagang duot sa katawhan ang interesado magpabakuna nga indikasyon nga nakuha sa gobyerno ang suporta sa mga tawo.
Subay niini duna nay team nga mitutok sa mga kakulian partikular sa registration system.
Gani kagahapon adlawa ang mga vaccination sites nga nag-problema sa sistema, nagpatuman sa alternatibong paagi aron mapadayon ang bakunahan.
