HUMAN nakarekober ang siyam ka indibidwal nga gikaengong natakboyan sa Covid-19 Delta variant sa GenSan. Giangkon ni Dr. Rochelle Oco, City Health Officer kini ang usa sa rason sa pagsaka sa Covid-19 cases atong Agosto ug Septyembre sa dakbayan.
Matud ni Oco, nakatala ang GenSan og 47 ‘variants of concern’ apan kasagaran niini ang gideklara nang fully recovered. Nakarekod sila og 26 ka kaso sa Alpha (United Kingdom) variant, pito ka Beta (South Africa) variant, siyam ka Delta (India) ug lima ka Theta (P.3 or new variant). Duha ka pasyente ang na-infect sa Beta ug usa sa Alpha variant ang namatay samtang 44 ang nakarekober.
Ang maong Covid-19 variants ang na-detect base sa resulta sa gipalapdan nga biosurveillance sa pakig-alayon sa DOH-12. Sa taho sa CHO, ang 44 ka variants case ang nasuta nga local, duha ang returning overseas Filipino workers (OFWs) ug usa ka local traveler. Una nang, gibutyag ni Oco nga dili siya ‘confident’ nga wala nay traces sa mga variant of concerns partikular sa Delta sa dakbayan. ( Richel Gubalani)
