Hindi pa umano dumarating ang El Nino phenomenon kaya may pagkakataon pa ang mga magsasaka na magtanim ngayong buwan hanggang Setyembre na siyang normal planting season, ayon ito sa OIC ng PAGASA Climate Monitoring and Prediction Section (CLIMPS) na si Dr. Esperanza Cayanan.
Sa ipinadalang Media Release sa Brigada News, sinabi ni Cayanan na sapat pa ang tubig ulan para matugunan ang pangangailangan ng mga magsasaka hanggang Setyembre kaya maaani pa ang mga pananim bago dumating ang El Nino.
Pagsapit aniya ng Setyembre ay mababawasan na ang mga pag-ulan hanggang Disyembre na magiging hudyat ng tagtuyot kung saan isa ang lalawigan ng Sorsogon sa 36 na mga probinsya ang posibleng makaranas ng ‘dry spell’ o pagkatuyo ng mga lupa habang dalawang probinsya ang makakaranas ng ‘drought’ o matinding tagtuyot.
