Sumaka na an ihap han mga natapnan hin COVID-19 virus ha Eastern Visayas.
Basar ha ginpagawas nga COVID-19 Case Bulletin ha Department of Health (DOH) Eastern Visayas Center for Health Development, mayda na 687 nga laboratory results kun diin 135 an nagpositibo tikang dida han Mayo 8 tubtob 14 yana nga tuig.
Pinakadamo naman an nahipatik nga kaso ha probinsya ha Leyte nga umabot ha 44 nga gindundan han Tacloban City nga mayda 43 nga kaso.
Samtang, ha probinsiya han Samar in mayda 22; 10 ha Northern Samar; 8 ha Eastern Samar; 4 ha Southern Leyte; 3 ha Biliran; ngan usa ha Ormoc City.
Maabot naman ha 19.65 porsyento an positivity rate ha rehiyon.
Nagpahimatngon naman an DOH ha publiko nga igpabilin nga magsunod ha mga ginpaptuman nga Minimum Public Health Standards labi na kun aadto ha pampubliko nga lugar.
