Ginsulod sang wala makilala nga kawatan ang isa ka Coop Mart sa Brgy. Poblacion, Pres. Roxas, Capiz takna alas 9:40 kaina sang aga.
Sandig sa Pres. Roxas MPS, nakabaton sila sang tawag gikan kay Ma. Rita Golero, 29-anyos, isa ka store officer kag residente sang Brgy. Cabugcabug, ginapahayag ginsulod sang kawatan ang Coop Mart nga iya gina-trabahuan.
Gilayon man nga ginpadulungan sang kapulisan ang lugar kag didto nahibaluan nga nag-agi ang wala makilala nga kawatan sa guba nga grills sa ikaduwa nga panalgan sang edipisyo kag ginbringka ang pertahan malapit sa nahamtangan sang vault nga ginabutangan sang kwarta.
Natigayon gid nga nataban sang suspek ang mas o menus P300,000 nga cash nga benta sang nasambit nga store.
Sa karon, nagapadayon pa ang imbestigasyon sang Pres. Roxas PNP sa nasambit nga insidente. | Judy Ann Juare
